Кызмат адамдары кармалды. Жалал-Абадда тез татым түйүнү жарылып, бир адам каза болгон

Жарылуудан адам каза болгон тез татым түйүнүн мыйзамсыз орнотуу фактысы боюнча Жалал-Абад шаардык мэриясынын кызмат адамдары кармалды. Бул тууралуу УКМК билдирди.

Маалыматка караганда, калаа мэриясынын алдындагы Керек-жарак рыногу жана кызмат көрсөтүү департаментинин жетекчилиги менен айрым кызматкерлери муниципалдык жерлерди тийиштүү уруксат документтери жок беришкени аныкталган.

"Керек-жарак рыногу жана кызмат көрсөтүү департаментинин директору И.К.Б., инспектор А.Т.А., түйүндүн ээси М.З.А. кармалып УКМКнын убактылуу кармоочу жайына киргизилди", — деп айтылат маалыматта.

Учурда окуяга жооптуу башка адамдарды аныктоо боюнча тергөө, ошондой эле тиешелүү ыкчам-издөө иш-чаралары жүргүзүлүүдө. Мындан тышкары, Жалал-Абад шаарынын аймагында муниципалдык жер участокторун мыйзамсыз берүү фактыларын текшерүү боюнча ведомстволор аралык комиссия түзүлдү.

Эске салсак, 13-июлда аталган соода түйүндөрүнүн биринде газдалган суу чыгаруучу газ баллондук жабдыктарда жарылуу болуп, анын кесепетинен сатуучу каза болгон. Мындан тышкары, бир нече адам ар кандай деңгээлдеги жаракат алган.