Колу-бутун байлап сууга ыргытып жиберишкен. Аламүдүндө оор кылмыштын бети ачылды

2023-жылдын 23-январында Чоң Чүй каналынан 34 жаштагы жарандын денеси табылган. 

Чүй облусунун ички иштер башкармалыгынын маалымат кызматы билдиргендей, жарандын денеси табылган учурда колу-буту байланган абалда болгон.

Маркум 2022-жылдын 19-декабрынан бери дайынсыз болуп, милициянын издөөсүндө турган.

Аталган кылмыштын бетин ачуу максатында ыкчам иш-чаранын алкагында 2000-жылы туулган У.Ш. жана 1991-жылы туулган Д.К. кылмышка шектүү катары кармалган.

Шектүүлөр айыбын моюнуна алып, маркумду 19-декабрда сабап, колу-бутун байлап сууга ыргытып жиберишкенин билдирген.