Коронавирустун белгилерин билбей жүргөн кызматкер 24 кесиптешине жугузган

Коронавируска ишенбеген да жарандар бар, бирок бул инфекция тез убакытта жугуп, тарап кетишин эске салабыз, деп билдирди саламаттыкты сактоо министринин орун басары Нурболот Үсөнбаев.

“Мисал келтирсек, борбордогу объекттердин биринде коронавирус жугузуп алган бир кызматкерде илдеттин симптомдору билинген эмес. Ал жумушка келип, иштей берген. Тилекке каршы, кыска убакыттын ичинде аны менен байланышта болгон 60 кызматкердин 24дө вирус тастыкталган”, - деди орун басар.

Андан сырткары, үй-бүлө мүчөлөрүнө дагы жугузган учурлар кездешүүдө. “Андыктан, ар бир адамды санитардык талаптарды так сактоого жана жоопкерчилик менен мамиле кылууга чакырабыз”, - деди Н.Үсөнбаев.

Ал кошумчалагандай, бүгүн жаңы катталган 60 учурдун ичинен 52си байланышта болгондордун арасынан табылды.