Кубатбек Боронов Ысык-Көлгө жумушчу сапар менен барат

Премьер-министр Кубатбек Боронов Ысык-Көл облусуна жумушчу сапар менен барат. Бул тууралуу өкмөттүн басма сөз кызматынан билдиришти.

Маалыматка ылайык, Кубатбек Боронов 21-22-августта Ысык-Көл облусуна жумушчу сапар менен барат.

Өкмөт башчы Ысык-Көл облусуна жасаган сапарынын алкагында социалдык объектилердин абалы, ичүүчү суу менен камсыздоо жана саркынды сууларды тазалоочу жайларын куруу иштери, “Таза суу” долбоорунун жүзөгө ашырылышы, күзгү оруп-жыюу жумуштарынын жүрүшү менен таанышат.

Мындан тышкары премьер-министр Кара-Кол шаарындагы 120 орундуу бала бакчанын курулушу жана Чолпон-Ата шаарында жайгашкан Ысык-Көл райондук ооруканасынын жугушту оорулар бөлүмүнүн имаратын ондоп-түздөө иштери менен таанышат.