Президенттин убактылуу милдетин аткаруучу, премьер-министр Садыр Жапаров кызматка киришкенден тарта эле коррупцияга каршы күрөштү күчөтүп, мындай көрүнүштөрдү таптакыр жок кыла турганын убада кылган. Акырындык менен коррупцияга каршы күрөш жүрүп жатканы менен, айрым тармактарда паракорлук кайра күч алды.
Маселен, Сооронбай Жээнбековдун тушунда Бишкек шаарында Патурулдук милиция түзүлгөн. Бул кызматка чет тилдерди билген, ошол эле учурда билими мыкты жаштарды кабыл алган эле. Мурда МАИде иштеген чоң курсактуу паракорлор сынактан өтпөй калганда сүйүнгөнбүз. Жаштардан куралган кызматта иштегендердин маяналары да 30 миң сомдон кем болгон эмес. Эң негизгиси аларга коомдук коопсуздукту, ошол эле учурда жол коопсуздугун камсыз кылуу тапшырылган жана көчөдө туруп алып ары-бери өткөн унааларды токтотуп, аларды тономой деген токтотулган. Муну өкмөт расмий токтому менен бекиткен.
5-октябрдагы бийлик алмашууга чейин Патрулдук милициянын кызматкерлери өкмөттүн токтомуна баш ийип жолдо тосчу эмес. Тилекке каршы, акыркы кездери бул кызматтын адамдары жашынып туруп унаа тосуп, элди тоной баштадыбы? Азыр Бишкектин көчөлөрүнүн ар кайсы бурчуна туруп карапайым калкты эзгени чынбы? Садыр Жапаров жана анын командасы бул көрүнүштү билеби? Улан Ниязбеков деген министр ушундай жол менен Жапаровду жек көрсөткүсү келип жатабы? Же МАИчилер элдин "жонунан тилип" тапкан акча менен жаңы бийликтегилер бөлүшүп жатабы? Тез арада мындай "акмакчылыкты" токтотпосо жаңы бийликтин түбүнө көчөдө туруп калктын канын соруп жаткан МАИлер жетет!
Канатбек Аскаров
Пикирлер (4)