Кыргыз Республикасынын Мамлекеттик салык кызматынын кызматкерлери тарабынан жүргүзүлгөн салыктык рейддик контролдун жүрүшүндө күйүүчү майларды керектүү коштомо жана уруксат берүүчү документтери жок сактоо фактылары катталган. Бул тууралуу Мамлекеттик салык кызматынын басма сөз кызматы билдирди.
Текшерүүнүн жыйынтыгында Жалал-Абад облусунун Ноокен районунда күйүүчү-майлоочу майларды мыйзамсыз сактоочу жайлар – май куюучу жай жана жеке турак жайдын короосундагы кампа аныкталган. Бул объектилерде 6 тоннага жакын (5 миң 872 литр) күйүүчү май тиешелүү уруксат документтери жок сакталган.
Мындан тышкары күйүүчү-майлоочу материалдарды сактоо эрежелерин бузуу, пломбалардын жоктугу, ошондой эле бир катар башка укук бузуулар аныкталган. Аталган фактылар боюнча Кыргыз Республикасынын мыйзамдарына жана соттун чечимине ылайык андан ары укуктук баа берүү максатында укук коргоо жана сот органдарына өткөрүп берүү үчүн материалдар даярдалууда.
Пикирлер (0)
Пикир жок. Сиз биринчилерден болушуңуз мүмкүн