Кыргызстанда стандарттарга жооп бербеген автомектептерди лицензияларын жокко чыгарып, кийин кара тизмеге киргизүүну пландаштырууда. Мындай идеяны бүгүн премьер-министр Улукбек Марипов өкмөттө өткөн жыйында билдирди.
"Кырсыктардын санынын өсүшү айдоочулардын каршы тилкеге чыгып кетишинен жана мас абалында унаа айдагандан улам болуп жатат. Айдоочуларды даярдоонун сапаты жөнүндө унутпашыбыз керек. Автомектептерди акыркы жолу текшерүү 2018-жылы жүргүзүлгөн. Системаны жана алар текшерилген критерийлерди кайрадан карап чыгуу керек. Талапка жооп бербеген автомектептердин лицензиялары биротоло жокко чыгарылып, кара тизмеге киргизилиши керек", - деди министрлер кабинетинин төрагасы.
Транспорт жана коммуникация министри Гүлмира Абдралиева республикада унаалардын санынын жыл сайын көбөйүшүнө көңүл бурду.
"Бул жергиликтүү жана республикалык магистралдардын абалына олуттуу таасир этет. Айрым аймактар жараксыз абалга келген. Капиталдык реконструкциялоо керек болгон жерлерде каржынын жоктугунан толук оңдөп-түзөө иштери жүргүзүлбөй жатат. Бул жол кыймылынын бардык катышуучулары үчүн белгилүү бир тобокелдиктерди жаратат", - деп белгиледи министр.
Пикирлер (0)
Пикир жок. Сиз биринчилерден болушуңуз мүмкүн