Мэр: Шаарда көп кабаттуу унаа токтотуучу жайлар курулат

Бишкек шаарында көп кабаттуу унаа токтотуучу жайлар курулат. Бул тууралуу Бишкек шаарынын мэри Эмилбек Абдыкадыров билдирди.

Анын айтуусуна караганда, бүгүнкү күндө долбоорду даярдоо иштери жүргүзүлүүдө.

"Бишкектин көчөлөрүн кеңейеткенибиз менен унаалар жолдун эки чекесине токтоп турат. Ушундай унаалардын баарын алышыбыз керек. Ал үчүн шаардын адамдар көп болгон жерлерине көп кабаттуу унаа токтотуучу жайларды курабыз. Эмнеге азырга чейин ишке ашпай жатат десеңиздер бул долбоор көп ишти талап кылат. Бүгүнкү күндө долбоорлорду даярдоо боюнча иштер жүрүп жатат. Биз баштаган ишти таштап койбойбуз",- деди мэр.

Мындан сырткары, калаа башчысы ишкерлерди ушул бизнеске салым кошууга чакырып, ишкерлерге жеңилдик берилерин кошумчалады.