Муфтий: Аялзатына болгон зомбулук, көңүл коштук, кордоо – чоң адилетсиздик

Муфтий Абдулазиз Закиров мекендештерге кайрылуу жолдоду. Анда ал азыркы заманда аялзатына болгон зомбулук, көңүл коштук, кордоо – бул жаратылыш мыйзамына, шариятка каршы келген чоң адилетсиздик экенин белгиледи.

“Ар бир аял – эне, жар, кыз жана эже катары коомдун түпкү тиреги экенин унутпашыбыз керек. Пайгамбарыбыз Мухаммад “силердин эң жакшыңар – аялдарына жакшы мамиле кылгандарыңар”, деп эркектерге аялзатына болгон мамиленин деңгээли менен ыйманын өлчөп берген. Аялзатынын укугу ыйык. Ага болгон кайдыгерлик – бул ыймандын алсыздыгы. Аялга урмат – коомго урмат. Аялга камкордук – үй-бүлөгө тынчтык. Аялга мээрим – келечекке бейпилдик. Ушул жерден ойчул Уинстон Черчилльдин да сөзү эске келет: “Аялды улуу кылган коом – улуу коом болот. Аялды тебелеген эл – өз тагдырын тебелейт”. Бул – акыйкат”, - деди муфтий.

Ошондой эле Абдулазиз Закиров Куранда эркек менен аял бири-бирин жаап, коргоп, кооздоп туруучу түгөйлөр экени баяндалганын айтты.

“Аялдын жан дүйнөсүнө тынчтык бербеген эркек – өзүн да тынчсыз кылат. Азыркы заманда аялзатына болгон зомбулук, көңүл коштук, кордоо – бул жаратылыш мыйзамына, шариятка каршы келген чоң адилетсиздик. Аял – өзүнүн аземин, өзөгүн, өзүн – биз эркектер аркылуу бекем сезет. Эгер биз коргоо милдетибизди унутсак, анда биз эркек эмес, тек гана кара күч болуп калабыз.

Эркектин улуулугу аялга жасаган мамилеси менен билинет. Аялга карата мээримдүү болгон эркек – раббисине жакын болот. Аял – эне катары жаннаттын эшигин ачат. Жар катары сенин бейишке болгон себепчиң. Кыз катары сенин жүрөгүңдүн назик күзгүсү. Аларды урматтоо – ибадат. Аларды тебелөө – пастык. Хадисте айтылгандай: “эненин таман алдында бейиш бар” – деп пайгамбарыбыз бейишке алып баруучу жол аялзаты аркылуу болорун ачык айткан”, - дейт Кыргызстан мусулмандарынын дин башкармалыгынын башчысы.

Мындан тышкары муфтий эр азаматтарга кайрылып, үй-бүлөнү сактоо алардын жоопкерчилигинде болуп саналарына токтолду.

“Сиздин сөзүңүз, көз карашыңыз, жүрүм-турумуңуз аялдын жүрөгүнө күн болуп тийиши мүмкүн. Же болбосо муздак шамалдай үшүтүп коюшу да мүмкүн. Эркек – дубалды тургузса, аял – анын ичин бейишке айлантат. Эгер дубалды тургузган менен ичин талкалап, эзип турсак – анда бизге бейиш кайда? Бүгүнкү күн – аялзатына болгон мамилени кайрадан карап чыгуу күнү. Ар бир күйөө – жубайына сүйүүнү, ар бир уул – энесине кызматты, ар бир ага – карындашына коргоону милдет деп билиши керек.

Жыйынтыктап айтарым, аял – мээримдин, сабырдын, таза сүйүүнүн жандуу мисалы. Ага урмат көрсөтүү – ыймандын күзгүсү. Ага зулумдук кылуу – жүрөктүн караңгылыгы.

Келгиле, аялзатына болгон көз карашыбызды Курандын нуруна, пайгамбарыбыздын сүннөтүнө ылайык түзөлү. Үй-бүлөнү мээрим менен, коомду адеп менен, аялзатын урмат менен курчап, раббибиздин ыраазылыгына жетели. Аллах Таала коомубузга тынчтык, үй-бүлөлөрүбүзгө бекемдик, аялзатына урмат-сый берген эр азаматтардан кылсын!”, - деп сөзүн жыйынтыктады Абдулазиз Закиров.