Нарын мамлекеттик университетинен 300дөн ашуун чет өлкөлүк студент чыгарылып, институттун директору кызматынан четтетилди. Бул тууралуу УКМК билдирди.
Маалыматка караганда, окуу жайдын дагы 13 кызматкери дисциплинардык жоопкерчиликке тартылып, ал эми жооптуу жетекчилерди иштен алуу сунушталган.
"2023-жылдын аягында окуу жайдын жетекчилиги жана жооптуу кызматкерлери 400дөн ашуун чет өлкөлүк студентти башка ЖОЖдордон которуу жолу менен кабыл алган. Тактап айтканда, атайын комиссия студенттерди окууга кирүү үчүн керектүү документтеринин жоктугуна жана сабактар боюнча академиялык айырмачылыктардын тийиштүү санынан ашып кеткенине карабастан дистанттык окууга өткөргөн", — деди УКМК.
Мындан тышкары, окуу жайдын жетекчилиги компетенттүү эмес кызматкерлерин комиссиянын курамына киргизип, айрым чет элдик студенттерди жасалма документтер менен университетке өтүүгө жол бергени белгиленди.
"Чет өлкөлүк жарандарды окутуу процессинде дагы бир катар одоно мыйзам бузуулар аныкталган. Мисалы, онлайн-сабактар өткөрүлбөй, негизсиз баалар коюлган, студенттердин жеке электрондук кабинетине кирүү мүмкүнчүлүгү көзөмөлсүз жана окуу графигинен тышкары берилген. Окуу акысы боюнча ири карыздар болгон. Студенттердин көпчүлүгүнүн мамлекеттик жана расмий тилдерди таптакыр билбегендигине карабастан аларга жогорку баалар коюлгандыгы аныкталды. Ал эми ЖОЖдо башка тилдерде окутуу каралган эмес", — деди атайын кызмат.
Муну менен коррупция үчүн шарт түзүлүп, өлкөнүн эл аралык билим берүү кызматтарына ишенимдин төмөндөшүнө өбөлгө түзүлгөнү кошумчаланды.
Пикирлер (0)
Пикир жок. Сиз биринчилерден болушуңуз мүмкүн