№8 Төлөйкөн шайлоо округунан Жогорку Кеңештин депутаттыгына талапкер Нурбек Алимбековдун штаб башчысы Нурлан Орозбаев ошол эле шайлоо округунан депутаттыкка талапкер Шайлообек Атазовдун билдирүүлөрүнө жооп кайтарды.
Орозбаевдин айтымында, Атазов Жогорку соттун чечимин күтпөстөн, монтаждалган, кескиленген видеону элге таңуулап жатат.
"Урматтуу Шайлообек Карыбекович, акыркы учурларда адамдарды топтоп алып, атайылап монтаждалган, ар жеринен кескиленген видеону улам элге алып чыгып, аны таңуулап жатасыз.
Сиз өзүңүздү эл алдында ыймандуу адам катары көрсөтүп келесиз. Эгерде чындап Кудайдан корксоңуз, монтаждалган видеонун толук вариантын элге көрсөтүп алып чыгыңыз!
Видеону толук көргөн адамсыз. "Агитатор качып кетти" дейсиз. Анын биздин штабга тиешеси жок адам экенин жакшы билесиз. Бирок мыйзамсыз түрдө өзүңүз жасаткан видеону кайра чындык катары көрсөткүңүз келип жатат.
Мыйзамдуу жолду тандаганыңызда 22-декабрда боло турган Жогорку Соттун чечимин күтүшүңүз керек эле. Бирок кайра эле каралоо менен алектенип, Алимбековдун штабын жаман көрсөтүүгө өттүңүз.
Мындан сырткары, өзүңүздөргө таандык журналист аркылуу бир күн жактоочуңуз, бир күн өзүңүз бир тараптуу жалган маалымат таратып, каралап жатасыз. Динде дагы атайылап жалган маалымат таратуу чоң күнөө болуп саналат. Андыктан, эми эсиңизге келип, мыйзам талаасында иш алып барууга чакырам. Ал эми эл кимдин ким экенин так ажыратып билип калганын эсиңизден чыгарбаңыз ",- деди Алимбековдун штаб башчысы Орозбаев.
Пикирлер (6)