Кыргызстандан зыярат кылуу үчүн Сауд Аравиясына өз алдынча кетишкен жарандар ал жактан эч кандай карантинге же обсервацияга алынган эмес. Бул тууралуу саламаттык сактоо министринин орун басары Төлө Исаков бүгүн, 18-мартта маалымат жыйында билдирди.
Анын айтымында, коронавирус катталган ажычылардын тобу Муфтият тарабынан уюштурулган эмес. Өз алдынча турист катары чакан ажылык кылуу сапары менен кетишкендер болуп чыкты.
"2-3-мартта келген зыяратчылар эч кандай карантинге алынган эмес. Аларды да колдон келишинче тактап, текшерүү чараларын уюштурабыз. Кийинки 12-мартта келген зыяратчылардын тобу гана обсервацияга алынып, азыр текшерүү, изилдөө иштери жүрүп жатат", - деди ал.
Ал кошумчалагандай, Умра жана Хаджга барган зыяратчылардын арасында чиновниктердин жакындары бар же жок экенине кызыккан эмес.
"Бирок чет мамлекеттен келгендердин ичинде депутаттардын эжеси, жубайы, министрдин туугандары, губернатордун кызы, жакын туугандары бар. Барына бирдей чара көрүп, абсервацияга алып медициналык байкоо жүргүзуп жатабыз", - деп кошумчалады Т.Исаков.
Пикирлер (0)
Пикир жок. Сиз биринчилерден болушуңуз мүмкүн