Ош шаардык балдар ооруканасынын бөлүмү капиталдык оңдоодон кийин ачылды

Ош облустар аралык балдар клиникалык ооруканасынын Кеңеш берүү жана дарт аныктоо бөлүмү капиталдык оңдоодон кийин бейтаптарга эшигин ачты.

Саламаттык сактоо министрлигинен билдиришкендей, оңдоо иштери амбулатордук бейтаптарга медициналык жардам көрсөтүүнү жакшыртуу жана калкка ыңгайлуу шарттарды түзүү максатында жүргүзүлдү.

Күн сайын бөлүм 800дөн 1000ге чейин бейтаптарды кабыл алат, ал эми сезондук курч жугуштуу оорулардын мезгилинде бул сан 1500 адамга жетет. Тар коридорлор жана кабинеттердин жетишсиздиги мурда ыңгайсыздыктарды жаратчу. Мындан улам, оңдоо иштери жана заманбап стандарттарга ылайык кеңейтүү зарылчылыгы келип чыккан.

Оңдоо иштеринин жүрүшүндө коридорлор кеңейтилип, бейтаптар үчүн ыңгайлуу шарттар түзүлдү. Кошумча невропатолог жана педиатр кабинеттери уюштурулуп, Кеңеш берүү жана дарт аныктоо бөлүмдө бейтаптарды кабыл алуу шарттары жакшыртылды.

Белгилей кетсек, Кеңеш берүү жана дарт аныктоо бөлүмдө, стационардык дарылоого кабыл алынганга чейин диагнозду тактоо үчүн пландуу текшерүүлөр жана изилдөөлөр жүргүзүлөт. 

Жалпысынан бөлүмдө 10 адис иштейт: педиатр (2 кабинет), невропатолог (3 кабинет), гастроэнтеролог, аллерголог, нефролог, гематолог, эндокринолог, окулист, лор, кардиолог.

Мындан тышкары, бөлүмдүн вентиляция системасы модернизацияланып, автоматтык өрт сигнализациясы орнотулду.

Капиталдык оңдоо иштерине бюджеттен каражат бөлүнүп, жалпы баасы 8 млн 377 миң 271 сомду түздү.