Ош шаардык соту бир тууган Матраимовдордун бөгөт чарасын кароодо

27-мартта Ош шаардык сотунда Бажы кызматынын төрагасынын мурдагы орун басары Райымбек Матраимовдун бир туугандары Тилек, Руслан, Исламбек Матраимовдордун бөгөт чарасы каралууда, деп билдирди “Азаттыктын” кабарчысы.

Улуттук коопсуздук боюнча мамлекеттик комитет (УКМК) эл аралык издөөдө жүргөн мурдагы бажычы Райымбек Матраимовду жана анын бир туугандарын 26-мартта Азербайжандын борбору Баку шаарынан Бишкекке алып келген.

Райымбек Матраимовго Кылмыш-жаза кодексинин 169-беренеси (“Эркиндигинен мыйзамсыз ажыратуу”) жана 222-беренеси (“Кылмыштуу жол менен алынган кирешелерди мыйзамдаштыруу/адалдоо”) менен кылмыш иши козголгон. Бишкектин Биринчи Май райондук соту мурдагы бажычыны 26-апрелге чейин камакка алуу чечимин чыгарды.