Күн мурун Парижде тышкы иштер министринин орун басары Медер Абакиров Франциянын президентинин дипломатиялык кеңешчиси Бертран Бушвальтер менен жолугушту. Бул тууралуу ведомстводон маалмдашты.
Маалыматка караганда, сүйлөшүүлөрдүн жүрүшүндө тараптар эки тараптуу саясий диалог, соода-экономикалык байланыштар, эл аралык аренадагы өз ара аракеттенүү, ошондой эле маданий-гуманитардык кызматташуу маселелерине өзгөчө көңүл буруп, кыргыз-француз кызматташтыгынын учурдагы абалын жана келечегин талкуулашты.
Медер Абакиров саясий байланыштарды мындан ары өнүктүрүү жана Франциянын арезиденти Эммануэль Макрондун Кыргызстанга сапарын уюштуруунун маанилүүлүгүн баса белгиледи.
Соода-экономикалык байланыштарды чыңдоого, тактап айтканда, туризм, энергетика жана авиация сыяктуу стратегиялык секторлордо биргелешкен долбоорлорду ишке ашырууга өзгөчө көңүл бурулду. Кыргыз тарап француз инвестициялары үчүн жагымдуу шарттарды түзүүгө даяр экендигин билдирип, Бишкекте кыргыз-француз бизнес-форумун өткөрүүнү сунуштады.
Маданий-билим берүү кызматташтыгы эки тараптуу мамилелерде салттуу түрдө маанилүү орунду ээлейт. Буга байланыштуу Кыргызстандын Франциядагы ийгиликтүү демилгелери, анын ичинде Париждеги Экинчи дүйнөлүк кинофестивалы белгиленди. Кыргыз тарап Францияга маданий демилгелерди колдогондугу үчүн ыраазычылык билдирип, бул жаатта кызматташууну мындан ары кеңейтүүгө даяр экендигин билдирди.
Жолугушуунун жыйынтыгы боюнча тараптар кыргыз-француз өнөктөштүгүн тереңдетүүгө умтууларын ырасташты жана эки тараптуу мамилелерди өнүктүрүү боюнча мындан аркы кадамдарды белгилешти.
Пикирлер (0)
Пикир жок. Сиз биринчилерден болушуңуз мүмкүн