Парламенттин басма сөз кызматынын жетекчисинен коронавирус аныкталды

Жогорку Кеңештин басма сөз кызматынын жетекчиси Ибраим Нуракун уулу COVID-19 илдетин жуктуруп алды. Бул тууралуу ал бүгүн, 18-июнда өзүнүн Фейсбуктагы баракчасы аркылуу маалымдады.

Анын айтымында, ушул дем алыш күнү дене табы жогорулагандыгына байланыштуу үйдө олтуруп иштеп жаткан. Жумушка чыгар алдында алдын ала текшерүүдөн өткөн. Анын анализинен COVID-19 аныкталганын доктурлар бүгүн кабарлашып, буга байланыштуу дагы 14 күн үйдөн чыкпай иштемей болгон.

Ал кошумчалагандай, карантин учурунда бир дагы кесиптеши менен кол алышып учурашкан эмес, жумуш маалында ар дайым антисептик, бет кап колдонуп келген. “Тилекке каршы, аяган көзгө чөп түшөт дегендей, бул өзүм жана үй-бүлөм үчүн абдан өкүнүчтүү окуя болду. Ылайым, оорубаңыздар!”, - деп белгиледи Ибраим Нуракун уулу.