Польшадагы президенттик шайлоолор экинчи тур менен жыйынтыкталат

Кечээ, 28-июнда Польшада кезектеги президенттик шайлоолор өткөрүлдү. Шайлоого 11 талапкер катышты.

Шайлоо протоколдорунун 99,78%ын эсептөөдөн кийин аракеттеги президент Анджей Дуда лидерлик позицияны ээледи.

Соңку маалыматтар боюнча ал 43,67% добушка ээ болду. Ал эми анын башкы атаандашы Рафаль Тшасковский үчүн шайлоочулардын 30,34 %ы добуш беришти. Үчүнчү орунга чыккан көз карандысыз талапкер Шимон Холвнянын алган добушу 13,85%га барып токтоду. Ал эми шайлоо комиссиясы жалпы катышууну 64,4% деп баалады.

РИА “Новостинин” маалыматы боюнча шайлонун экинчи туру 12-июлда өтөт жана анда Дуда менен Тшасковский күч сынашат.