Президент Евробиримдиктин эл аралык өнөктөштүк боюнча комиссары Йозеф Сикеланы кабыл алды

“Ынтымак Ордодо” президент Садыр Жапаров Европа Биримдигинин эл аралык өнөктөштүк боюнча комиссары Йозеф Сикеланы кабыл алды.

Европа Биримдигинин жогорку өкүлүн кабыл алууда Кыргызстан көз карандысыздыкка ээ болгондон бери ишенимдүү өнөктөш экенин, мындан ары да Европа Биримдиги менен ар тараптуу кызматташтыкты өнүктүрүүгө артыкчылыктуу маани берерин президент белгиледи.

“Кыргызстан Евробиримдиктин Борбордук Азиядагы негизги өнөктөшү катары энергетика, тоо кен, транспорт, жашыл экономика, айыл чарба, туризм тармагындагы долбоорлорду ишке ашырууга көмөктөшөөрүнө ишенем. Жашыл экономиканы өнүктүрүү Кыргызстан үчүн абдан маанилүү. Сиздерди "Камбар-Ата-1” ГЭСи боюнча мындан ары да көмөктөшүүңүздөрдү өтүнөбүз", – деди Садыр Жапаров.

Өз кезегинде Йозеф Сикела президентке жолугушуу мүмкүнчүлүгү үчүн ыраазычылык билдирип, Европа Биримдиги аймакка чоң көңүл буруп жатканын белгиледи.

“Бул менин эл аралык өнөктөштүк боюнча комиссар катары биринчи маанилүү миссиям. Мен Борбор Азиянын бардык беш өлкөсүнө баруу чечимин кокусунан кабыл алган жокмун. Бул Европа Биримдигинин Кыргызстан жана аймактагы башка мамлекеттер менен тереңирээк жана туруктуу өз ара аракеттенүүнү камсыз кылуу ниетин ачык тастыктайт. Биз Кыргызстанда суу системасын жакшыртууга, жана башка долбоорлор боюнча анализ жасап көрүп колдоого даярбыз",– деди еврокомиссар.

Жолугушууда транспорттук коридорлорду, туруктуу энергетиканы жана санариптик чечимдерди өнүктүрүү боюнча учурдагы жана жаңы экономикалык долбоорлорду ишке ашырууга басым жасоо менен эки тараптуу күн тартибинин бир катар практикалык маселелерин талкуулашты.

Ошондой эле аймактык жана глобалдык күн тартибиндеги актуалдуу маселелер боюнча пикир алмашуу болду.

Эскерте кетсек, Европа Биримдигинин Кыргызстандагы өкүлчүлүгүнүн сайтында маалымдалгандай, еврокомиссар үстүбүздөгү жылдын 12-18-мартына чейин Борбордук Азиянын беш өлкөсүн кыдырууда.