Президент: Кыргызстанда сөз эркиндиги жок болсо, анда ушул аскер айым эфирден түздөн-түз кайрылуу жасап чыкпайт эле

Президент Садыр Жапаров Кыргызстанда сөз эркиндиги бар экенин дагы бир жолу кайталады. Бул тууралуу мамлекет башчы 8-февралда Фейсбуктагы расмий баракчасына үч тилде – кыргыз, орус жана англис тилинде пост жазды.

Билдирүүсүнө Каракол шаарындагы №2028 аскер бөлүгүндөгү жоокерлерге зордук-зомбулук болуп жатканы тууралуу социалдык тармактарда өлкө жетекчилилерине кайрылуу кылган кенже сержант Жылдыз Асанакунованын видеосун чыгарды.

“Эгерде Кыргызстанда сөз эркиндиги, адам укугу жок болсо, анда ушул аскер айым эфирден түздөн-түз кайрылуу жасап чыкпайт эле. Азыр аскер прокуратурасы бул боюнча дыкат иш алып барууда. Жыйынтыгы жарыяланат. Мындай мисалдар бизде көп. Кыргызстанда сөз эркиндиги болуп келген жана боло берет”, - деп жазды президент.

Белгилей кетсек, Улуттук коопсуздук боюнча мамлекеттик комитеттин (УКМК) басма сөз кызматы Жылдыз Асанакунованын маалыматы тастыкталбаганын билдирген.