Президент курулуш компаниялары үчүн 12%дык кошумча нарк салыгын киргизүүгө каршы

Президент Садыр Жапаров курулуш компаниялары үчүн 12 пайыздык кошумча нарк салыгын (КНС) киргизүүгө каршы. Бул тууралуу Жогорку Кеңештин төрагасы Нурланбек Шакиев билдирди.

Анын айтымында, спикер жыйындын алдында өлкө башчы менен аталган маселени талкуулаган. Президент 12 пайыздык кошумча нарк салыгына байланышкан беренени экинчи окууда алып салууну талап кылганы белгиленди.

"Министрлер кабинетинин тийиштүү жетекчилери өлкө башчысына бул мыйзам долбоору боюнча туура маалымат жеткирбепсиздер. Президент угуп алып, абдан кабатырланды. Бул нерсе болбош керек болчу. Мен да курулуш тармагына кошумча нарк салыгынын киргизилишине каршымын. Биз ипотекалык программаларды жыргаганыбыздан ишке ашырып жаткан жокпуз. Жашоо-шарты оор, мүмкүнчүлүгү чектелген, үйгө муктаж жарандарыбызды турак жай менен камсыздай албай жатып, кайра курулуш тармагына салыкты көбөйткөнүбүз туура эмес. Эгер жаңы салык киргизилсе, үйлөрдүн баасы дагы жогорулап, калкка бир топ кыйынчылык жаратат. Демилгечилер бир пикирде болуп, такташып келсеңер болмок", — деди Шакиев.

Жогорку Кеңеште экономика жана коммерция министри Данияр Амангелдиев "Салык салуу чөйрөсүндөгү айрым мыйзам актыларына өзгөртүүлөрдү киргизүү жөнүндөгү" мыйзам долбоору боюнча баяндама жасаган. Андагы курулуш компаниялары үчүн 12 пайыздык кошумча нарк салыгын киргизүү сунушу сынга алынган.

Жыйынтыгында мыйзам долбоору биринчи окууда 67 добуш менен кабыл алынды.