Экс-президент Роза Отунбаева 10-январдагы мөөнөтүнөн мурда өткөн президенттик шайлоодон жеңип чыккан Садыр Жапаровду куттуктады. Отунбаева алдыда татаал реформалар турганын, бири-бирибизди колдосок гана ийгиликке жете турганыбызды билдирген.
“Сизди Кыргыз Республикасынын Президентинин кызмат ордуна шайланышыңыз менен чын жүрөктөн куттуктайм! Сиз бул кызматка өлкө оор социалдык-экономикалык кризисти башынан өткөрүп жаткан маалда келип жатасыз. Өткөн шайлоонун жыйынтыгы адамдардын келечекке болгон үмүтү жана ишеними сизден көз каранды экендигин айкын көрсөттү. Сиз добуштардын басымдуу көпчүлүгүн алдыңыз. Алдыда татаал реформалар күтүп турат. Ар бирибиз өткөөл мезгилдин кыйынчылыктарын түшүнүп, колдосок гана ийгиликке жетебиз деп терең ишенем. Элибиз “Жабыла көтөргөн жүк жеңил болот” дейт эмеспи. Коомдогу бардык күчтөрдүн башын бир максатка бириктирип, бир багытка баштоого дараметиңиз жете турганына, Сиздин жетекчилик менен Кыргыз Республикасынын эгемендүүлүгүнүн отузунчу жылы чоң бурулуштардын жылы боло турганына ишенем”, - деп айтылат Отунбаеванын куттуктоосунда.
Пикирлер (3)