Садыр Жапаровдун Тажикстанга болгон бир күндүк иш сапары аяктады

Кыргызстандын президенти Садыр Жапаровдун 31-мартта Худжанд шаарына болгон иш сапары аяктады.

Президент Садыр Жапаров Тажикстандын президенти Эмомали Рахмон менен тет-а-тет форматында сүйлөшүүлөрдү өткөрдү.

Эки өлкөнүн лидерлери эки тараптуу кызматташуунун, анын ичинде соода-экономикалык, энергетикалык жана маданий-гуманитардык тармактардагы өз ара аракеттенүүнүн кеңири чөйрөсүн талкуулашты.

Андан соң президент Садыр Жапаров жана президент Эмомали Рахмон Ратификациялык грамоталар менен алмашуу жөнүндө протоколго кол коюу аземине катышты.

Мамлекет башчылары бул келишим эки өлкөнүн ортосундагы ар тараптуу өз ара аракеттенүүнүн бекем пайдубалы болуп, келечек муундарга саясий жетилгендиктин, боордоштуктун жана тарыхый жоопкерчиликтин үлгүсү болооруна ишенимин билдиришти.

Ошондой эле эки мамлекеттин лидерлери “CASA-1000” долбоорунун алкагында видеоконференция байланыш режиминде 500 кВ "Датка-Сугд" чубалгысын ишке киргизүү аземине катышты.

Сапардын алкагында Кыргызстандын президенти Садыр Жапаров, Тажикстандын президенти Эмомали Рахмон жана Өзбекстандын президенти Шавкат Мирзиёев үч тараптуу сүйлөшүүлөрдү өткөрүштү.

Мамлекет башчылары регионалдык кызматташтыктын актуалдуу маселелерин талкуулап, ынак коңшулук мамилелерди чыңдоонун, инфраструктуралык жана экономикалык долбоорлорду биргелешип ишке ашыруунун, ошондой эле региондун туристтик мүмкүнчүлүктөрүн кеңейтүүнүн маанилүүлүгүн белгилешти.

Үч өлкөнүн президенттери Үч мамлекеттин мамлекеттик чек араларынын кесилишкен чекити жөнүндө келишимге жана Түбөлүк достук жөнүндө Худжанд декларациясына кол коюшту.

Мамлекет башчылары бул документтерге кол коюу өлкөлөрдүн эгемендүүлүгүн жана аймактык бүтүндүгүн урматтоону символдоштурарын, ошондой эле Борбор Азияда конструктивдүү диалогдун жана натыйжалуу кызматташтыктын үлгүсү катары кызмат кылаарын баса белгилешти.

Мындан тышкары, үч өлкөнүн лидерлери үч өлкөнүн мамлекеттик чек аралары кесилишкен чекитте орнотулган символикалык стеланын ачылыш аземине катышты. Салтанаттуу иш-чара Худжанд шаарынан видеоконференция байланышы форматында өттү.

Андан соң Худжанд шаарында Кыргызстандын президенти Садыр Жапаров менен Өзбекстандын президенти Шавкат Мирзиёевдин жолугушуусу болду.

Мамлекет башчылары эки тараптуу кызматташтыктын актуалдуу маселелерин талкуулашты, регионалдык күн тартибинин негизги аспектилери боюнча пикир алмашышты.

Андан кийин маданий иш-чаралардын алкагында Кыргызстан, Тажикстан жана Өзбекстандын президенттери Худжанд чебине барып, Нооруз майрамына карата уюштурулган маданий иш-чараларга катышты. Мамлекет башчылары элдик кол өнөрчүлүк, айыл чарба азыктары, улуттук тамак-аш жана маданий каада-салттары менен таанышты, ошондой эле музейди кыдырышты, сепилге барганы театрлаштырылган оюн-зоокту көрүү менен аяктады.

Жыйынтыктоочу иш-чара - Худжанд шаарынын борбордук стадионунда эл аралык Нооруз майрамына арналган Кыргызстан, Тажикстан жана Өзбекстандын маданият жана искусство ишмерлеринин катышуусунда концерттик программа болду.

Иш сапарын аяктап, президент Садыр Жапаров 31-мартта Бишкек шаарына кайтып келди.