Сооронбай Жээнбеков Аксы окуясынын курмандыктарына таазим кылды (фото)

Президент Сооронбай Жээнбеков бүгүн, 17-мартта Аксы окуясында каза болгондордун элесине таазим кылды, деп билдирет президенттин басма сөз кызматы.

Мамлекет башчысы 2002-жылдагы Аксы окуясында жана 2010-жылы Бишкек шаарынын «Ала-Тоо» аянтындагы Апрель окуясында эркиндик үчүн курман болгондордун элесине арналган монументке гүл койду.

2002-жылдын 17-мартында Үзөңгү-Куушту Кытайга бербөө жана абакта жаткан Жогорку Кеңештин депутаты Азимбек Бекназаровду бошотуу талабы менен бараткан Аксылыктарга ок атылган. Натыйжада 6 адам каза болуп, бир нече адам түрдүү жаракаттарды алган.