Сот Финансы, Ички иштер министрликтерин күнөөсүз камалган активисттерге 500 миң сомдон төлөп берүүнү милдеттендирди. Бул тууралуу Биринчи май райондук сотунун чечиминде айтылган.
Эске салсак, 2023-жылдын 14-июлунда Селекция айылында таза суу маселесин чечүү талабы менен жол тосулган. ИИМ "Мыйзамсыз жол тосуу" жана "Бейбаштык" беренелери менен иш козгоп, ошол жылдын 15-июлунда блогер Эртай Искаков менен жергиликтүү тургундар Бакыт Балбаев жана Бактыбек Бекболотов кармалган. Алар айылга окуяны чагылдыруу үчүн барганы айтылган.
Сокулук райондук соту аларды №1 тергөө абагына эки айга камоо чечимин чыгарган. Кийин Сокулук райондук соту үчөөнү бейбаштык боюнча актап, бирок мыйзамсыз жол тосуу боюнча күнөөлүү деп тапкан. Натыйжада Искаковго 50 миң сом айып салынса, Балбаев менен Бекболотов 100 күндүк коомдук жумуштарга милдеттендирилген. Бирок кийин Чүй облустук соту жана Жогорку сот аларды толугу менен актаган.
Камакта эки айдан ашык күнөөсүз отурган Балбаев менен Бекболотов мыйзамсыз кылмыш ишине кабылгандыгын белгилеп, Ички иштер министрлиги менен Финансы министрлигинен материалдык жана моралдык кенемте өндүрүү үчүн Биринчи май райондук сотуна доо арыз менен кайрылышкан.
"Жабырлануучулардын пайдасына моралдык зыян катары ар бирине 500 миң сомдон компенсация өндүрүлгөн", — деп жазылган соттун маалыматында.
Пикирлер (0)
Пикир жок. Сиз биринчилерден болушуңуз мүмкүн