Сот тутумундагы коррупция жалпы журтубуздун мамлекетке болгон ишенимин солгундатат. Бул тууралуу президент Садыр Жапаров Кыргыз Республикасынын судьяларынын ХIII курултайында сүйлөгөн сөзүндө билдирди.
Анын айтымында, өлкө жетекчилигинин эң маанилүү багыттарынын бири бул коррупциянын тамырын кыркуу.
“Мына ошондуктан “Соттун таразасы калыс болсо, элдин ишеними бекем болот” деген учкул сөздү эске алуу менен биз антикоррупциялык мыйзамдарды күчөтүүнүн үстүндөбүз.
Кыргызстандын мыйзамдарына коррупцияга каршы күрөшүү жаатында киргизилип жаткан түзөтүүлөр мамлекеттин коррупцияга каршы күрөшүүгө болгон бекем ниетин көрсөтүп турат.
Мунун баары мамлекеттик башкаруу системасындагы жооптуу адамдардын коррупциялык мыйзам бузуу аракеттерин алдын алууга багытталган.
Сиздер сот бийлигинин өкүлдөрү катары мен эмне тууралуу айтып жатканымды жакшы түшүнүп турасыздар деп ойлойм. Өлкөбүздө коррупцияга каршы күрөш өтө актуалдуу маселе бойдон калып жатканын эске алуу менен бул маселени ушул жыйында көтөрүүнү зарыл деп эсептейм. Бул көйгөйгө дыкат көңүл буруп, тиешелүү жыйынтыктарды чыгарасыздар деп ишенем”, -деди Садыр Жапаров.
Эске салсак, бүгүн мамлекеттик резиденцияда Кыргыз Республикасынын судьяларынын кезектеги ХIII курултайы өтүүдө.
Пикирлер (0)
Пикир жок. Сиз биринчилерден болушуңуз мүмкүн