Сузакта алдын алуу иш-чарасы учурунда издөөдө жүргөн адам кармалды (сүрөт)

Сузак районунда “Көчө” аталышындагы ыкчам алдын алуу иш-чарасы өткөрүлүп, бир топ кылмыштын бети ачылды. Бул тууралуу Жалал-Абад ОИИБдин басма сөз кызматынан билдирди.

Маалыматка ылайык, 22-23-июнь күндөрү Сузак РИИБи тарабынан район аймагындагы коомдук жайларда, көчөлөрдө укук бузуулардын алдын алуу, кылмыштуулукка жол бербөө жана коронавирус илдетинин жайылышына бөгөт коюу максатында “Көчө” аталышындагы ыкчам алдын алуу иш-чарасы өткөрүлгөн.

Алдын алуу иш-чарасы учурунда 360-берене (эски редакция) менен айыпталып, издөөдө жүргөн 22 жаштагы Т.С. кармалып убактылуу кармоочу жайга киргизилген. Ошону менен катар “Ээнбаштык” жана “Уурдоо” фактыларынын бети ачылып, тергөө кызматына өткөрүлүп берилген.

Иш-чара учурунда бузуулар боюнча 28 протокол түзүлгөн. Андан сырткары жалпы 195 кожолук текшерилип, профилактикалык каттоодо турган атуулдар менен түшүндүрүү иш-чаралары жүргүзүлгөн.