Сузакта каза болгон дарыгер коронавирус жуктурган эмес, - министрлик

Сузак районунда каза болгон дарыгер коронавирус жуктурган эмес. Бул тууралуу Саламаттыкты сактоо министрлигинин басма сөз кызматынан кабарлашты.  

Маалыматка ылайык, 3-апрель күнү Сузак аймактык ооруканасында  64 жаштагы Б.А.  аттуу дарыгер каза болгон. Анын өлүмүнө "пневмония" дарты менен көп жылдан бери жабыркап келгени себеп болгон. Каза болгон дарыгер оор абалда 31-мартта ооруканага түшкөн.  Бейтап келгенде абалы өтө оор болгондуктан реанимациялык бөлүмгө кабыл алынган. 

"Көрсөтүлгөн жардамга карабастан, бейтап үстүбүздөгү жылдын 3-апрелинде көз жумду. Өлүмдүн себеби бейтаптын ооруканага өз убагында кайрылбай, өз алдынча дарыланганынан улам пневмония өтүшүп, дем алуунун начарлоосу, өпкө артериясынын тромбоэмболиясы келип чыккан", - деп айтылат маалыматта. 

Белгилей кетсек, буга чейин айрым социалдык тармактын колдонуучулары Сузакта коронавирус илдетинен бир дарыгер каза болду, аны жашырып жатышат деген маалыматтарды жазып чыгышкан эле.