Таласта айыл өкмөтү шайлоого аралашканы үчүн кызматтан бошотулду

Айыл өкмөт башчысы шайлоо өнөктүгүнө аралашканы үчүн кызматынан бошотулду. Бул тууралуу Талас облусу боюнча өкүлчүлүктүн басма сөз кызматы билдирди.

Бүгүн, 12-ноябрда Кыргыз Республикасынын Жогорку Кеңешинин депутаттарын шайлоо өнөктүгүнө аралашкандыгы үчүн Талас районунун Кууганды айыл өкмөтүнүн башчысы Молдокулов Бактыбек Сурапович 2021-жылдын 12-ноябрынан баштап ээлеген кызматынан бошотулду. Тиешелүү буйрукка Талас райондук мамлекеттик администрация башчысы Нургазы Нармырзаев кол койду.

 Белгилей кетсек, айыл өкмөт башчысы “2021 жылдын 28-ноябрында Кыргыз Республикасынын Жогорку Кеңешинин депутаттарын шайлоону эркин, таза жана ачык-айкын өткөрүүнү камсыз кылуу боюнча чаралар жөнүндө” Кыргыз Республикасынын Президентинин 2021-жылдын 1-ноябрында жарлыгына ылайык кызматтан алынган.

Ошондой эле, “Жергиликтүү мамлекеттик администрация жана жергиликтүү өз алдынча башкаруу органдары жөнүндөгү” 2021-жылдын 20-октябрындагы Кыргыз Республикасын мыйзамынын 11-беренесинин 1-бөлүмүнө ылайык айыл өкмөт башчысын кызматтан алууну райондук мамлекеттик администрация башчысы-акими ишке ашырды.