Таласта прокуратура кызматкерлери үчүн кызматтык үй берилди

Талас областтык прокуратурасынын кызматкерлери үчүн кызматтык үй пайдаланууга берилди. Бул тууралуу Башкы прокуратуранын басма сөз кызматы билдирди.

Бүгүн, 24-февралда Кыргыз Республикасынын Башкы прокурору К.Зулушевдин катышуусунда Талас шаарында Талас областтык прокуратурасынын кызматкерлери үчүн 32 батирлүү 4 кабаттуу үй салынган кызматтык үйдүн ачылыш аземи болуп өттү.

Салтанаттуу иш-чарада башкы прокурор Курманкул Зулушев, прокуратура органдарынын кызматкерлери мамлекеттин укуктук тутумун чыңдап, кандай гана климаттык шарт болбосун өлкө аймагында мыйзамдын үстөмдүгүн камсыз кылуу боюнча өзүнүн конституциялык милдеттерин кынтыксыз аткарууга тийиш экендигин баса белгиледи.

Иш чарага областтык прокуратура органдарынын жетекчилиги жана өздүк курамы, прокуратура органдарынын ардагерлери, ошондой эле жергиликтүү бийлик өкүлдөрү катышты.