Бирөө изделүүдө. Таласта "Киров" суу сактагычынан үч баланын сөөгү табылды

Маалыматка ылайык, кечээ, 24-июнда, Талас облусунун Кара-Буура районуна караштуу Үч-Булак айылында 13 жана 11 жаштагы бала Киров суу сактагычына түшүп кеткен. Ал жерге үч куткаруучу барып, бирок натыйжа болгон эмес. Ал эми бүгүн, 25-июнда, таң эрте издөө иштери уланып, саат 9:30 чамасында эки баланын сөөгү табылган.

Мындан сырткары, кечээ дагы бир кырсык катталган. Бакай-Ата районунун Ак-Дөбө айылынан өтүүчү кичи Талас каналына 14 жана 13 жаштагы өспүрүм кыздар чөгүп кеткен.

Издөө иштерине бүгүн 10 куткаруучу тартылган. Саат 08:30 чамасында бирөөнү жергиликтүү тургундар тапканы айтылган.

ӨКМ учурда издөө иштери уланып жатканын айтты.

ӨКМ кыргызстандыктарды балдарын чоңдордун көзөмөлүсүз сууга түшкөнгө жибербей, коопсуздук эрежелерин сактоого чакырууда.