Таласта муктаж 100 үй-бүлөгө жардам көрсөтүлдү

Талас облусуна караштуу Манас районунда жардамга муктаж 100 үй-бүлөгө азык-түлүк таратылды. Бул тууралуу муфтияттын басма сөз кыматынан билдиришти.

Маалыматка ылайык, Бишкек шаарындагы демилгелүү жаштар тобунун демөөрчүлүгү менен Манас районунда кайрымдуулук иш-чарасы өткөрүлдү. Анда 100 даана азык-түлүк баштыкчасы Сөкөт, Кара-Арча, Арал, Пакровка эки тарап, Көк–Дөбө, Май, Кеңеш, Кызыл—Жылдыз айылдарына таратылып берилген.

Кайрымдуулук ишине демөөрчүлүк кылгандарга хатибият тарабынан айыл тургундарынан алкыштар айтылып, алардын үй-бүлөлөрүнө ынтымак, ырашкерлик, иштерине ийгиликтерди каалашып, батасын беришкен.

Ар бир баштыкча 1500 сомдон даярдалып, 5 кг макарон, 5 литир май, 10 кг ун, 3  кг кум шекер, 3 кг күрүч салынган.

Билдирүүгө таянсак, Манас районунун баш имам хатиби Миржалал ажы Дадабаевдин мындай соопчулук иш-чарасы ушуну менен жетинчи жолу өткөрүлүүдө.