Ташиев маморган кызматкерлерине катуу эскертүү берди

2025-2026-жылдары коррупция толугу менен жоюлушу керек. Бул тууралуу УКМКнын төрагасы Камчыбек Ташиев кайрылуусунда билдирди.

Анын айтымында, өлкөдө коррупционерлерге карата катаал мыйзамдар күчүнө кирди.

"2025-2026-жылдары коррупция толугу менен жоюлушу керек. Катаал мыйзамдар күчүнө кирди. Бардыгына, айрыкча мамлекеттик кызматкерлерге эскертем, кийин билбей калдым дебегиле. Учурунда уюшкан кылмыштуу топторго каршы күрөш башталганда көптөр күлүшкөн, бирок учурда Кыргызстанда уюшкан кылмыштуу топтор жок экенин ишенимдүү айта алам. Коррупция дагы ошондой жок кылынат", — деди Ташиев.

Ал ошондой эле күч структуралары күнөөсүз адамдардын мойнуна кылмыш илип же атайын жасалган иштерге аралаштырбашы керектигин эскертип, алардын "мындай жыйынтыгынын" кереги жок экенин айтты.

Белгилей кетсек, 31-декабрда президент Садыр Жапаров коррупционерлердин жазасын катаалдаткан мыйзамга кол койгон. Ага ылайык, коррупционерлер кызматка бара албайт жана сөзсүз абакта жазасын өтөйт.