Кыргызстандын Өзбекстандагы элчиси Дүйшөнкул Чотонов менен Өзбекстандын айыл чарба министри Иброхим Абдурахмонов менен болгон жолугушуусунда эки кошуна өлкөнүн айыл чарба тармагындагы кызматташтыгынын учурдагы абалы жана келечектеги артыкчылыктуу багыттары талкууланды.
Ташкенттеги кыргыз дипмиссиясынын басма сөз кызматы билдиргендей, айыл чарба тармагындагы кызматташтыкты мындан ары өнүктүрүү маселелери жолугушуунун көңүл чордонунда болду. Кыргызстанда багбанчылык, мал чарбачылык, үрөнчүлүк, картошка менен күрүч өстүрүү боюнча кооперациялык долбоорлорду тездетүү зарылдыгы баса белгиленди жана кеңири талкууланды.
Элчи Чотонов региондун экономикалык кызматташтыгын бекемдөөдө айыл чарба продукциясы менен чек ара соодасынын маанилүү ролун баса белгиледи. Мындан тышкары, айыл чарба тармагында илимий кызматташтыкты өнүктүрүүгө жана тиешелүү ЖОЖдордун ортосунда байланыштарды түзүүнүн зарылчылыгы айтылды.
Жолугушуунун соңунда тараптар айыл чарба тармагында мындан аркы активдүү өз ара аракеттенүүгө жана эки тараптуу мамилелерди чыңдоого бардык күч-аракетин жумшоо ниетин билдиришти.
Пикирлер (0)
Пикир жок. Сиз биринчилерден болушуңуз мүмкүн