Тендер жарыяланды. Бишкекте 4 көпүрө кеңейтилип, айрымдары курулат

Бишкекте төрт көпүрө кеңейтилип, айрымдары курулат. Бул тууралуу мамлекеттик сатып алуулар порталында кабарланды.

Бишкек мэриясы жети объектинин курулушуна долбоордук-изилдөө иштерин аткаруу боюнча тендер жарыялаган. Ага ылайык, Жаманбаев көчөсүнөн Горький көчөсүнө чейинки Айтматов проспектинин бир бөлүгү оңдолуп, Ала-Арча дарыясы аркылуу өткөн көпүрө кеңейтилет. Буга 2,4 миллион сом сарптоо пландалууда.

Ошондой эле Кара-Дарыя көчөсүнүн Медеровдон Ахунбаевге чейинки бөлүгү реконструкцияланып, Чыгыш Чоң Чүй каналына көпүрө курулат. Бул үчүн 2,7 миллион сом коротулмакчы.

Валиханов көчөсүнүн Анкарадан Сухэ-Баторго чейинки бөлүгү Чыгыш Чоң Чүй каналына көпүрө куруу менен оңдолот. Анын баасы – 3,3 миллион сом.

Мындан тышкары, Достоевский көчөсүн Ахунбаевден Куланакка чейин оңдоо мерчемделген. Ага 928 миң сом каралууда. Безымянный көчөсү Түштүк Чоң Чүй каналын бойлой Токомбаевден Байтик баатыр көчөсүнө чейин оңдолот. Буга 2,8 миллион сом каралган.

Жалпы 14,4 миллион сом коротуу пландалган. Тапшырыктар 26-мартка чейин кабыл алынат.