Токмокто уурулукка кирген адам мас болуп уктап калган

Токмок шаарында уурулук жасап жаткан жеринен мас болуп, диванга уктап кеткен шектүү кармалды.

Чүй облустук ички иштер башкы башкармалыгынан билдиришкендей, 9-мартка караган түнү Жантаев көчөсүндө жайгашкан «Бакыт» кафесине белгисиз адам терезени сындырып кирген.

Шектүү зер буюмдарды жана башка мүлктөрдү уурдоого аракет кылган, ошондой эле видеокамералардын процессорун сындырып, алкоголдук ичимдиктерди ичкен. Мындан улам, аталган мекемеге 150 миң сомдук материалдык зыян келтирилген.

Аталган факты каттоого алынып, КР Кылмыш-жаза кодексинин 37, 205-беренелери (Уурдоо аракети) жана 216-беренеси (Башка бирөөнүн мүлкүн жок кылуу же зыянга учуратуу) боюнча кылмыштардын негизинде кылмыш иши козголду.

Иликтөө иштеринин жүрүшүндө, 2025-жылдын 8-мартынан 9-мартына караган түнү «Бакыт» кафесинде сигнализация иштеп, мындан улам күзөтчүлөр келген. Текшерүүдө короодо курулуш шаймандары, идиш-аяк, музыкалык аппарат баары бир жерге топтолуп турганы жана терезенин сынганы аныкталган. Кафенин ээси менен биргеликте ичине киришкенде, баш аламандык жана ачылган сейфтин ичинен баалуу буюмдар жана акчалар жоголгону аныкталган. Андан соң залга киришкенде диванда мас абалында европа түспөлүндөгү адам уктап жатканынан күбө болушкан.

10-март күнү кылмышка шектүү, мурда соттолгон 1984-жылы туулган Т.В. аттуу жаран кармалып, убактылуу кармоочу жайга киргизилген.

Учурда тергөө иштери уланууда.