Жалал-Абад облусунун Токтогул районун аймагында спирт ичимдиктерин сатууга тыюу салынышын элдин 90 пайызы колдоп жатат. Бул тууралуу Токтогул районун активисттеринин бири Аскар Дөөлөткелдиев “Медиа центр” мультимедиалык-маалымат агенттигине маек берип жатып билдирди.
Анын айтымында ар бир айылга ичимдиктин зыяндуулугу тууралуу баннерлер илинип, айыл эли тарабынан жылуу кабыл алынууда. Ал эми айылдын депутаттары, мугалимдер спирт ичимдиктеринин сатылуусуна каршы туруп, активистер менен бирге иш алып барууда.
“Эки ай мурда Москва шаарындагы Токтогул районун коому тарабынан ичимдиктерди сатууга тыюуу салуу тууралуу сунуш түшкөн. Аны Токтогулдагы жаштар, активистер колдоп, буга чейин ар бир айыл өкмөттөрдө түшүндүрүү иштерин жүргүзүп келдик. Иш-чаранын башкы планында ичимдикти сатууга жана ичүүгө баардык айылдардын тургундарынын оюн угуп чыгып, кол топтоо болчу. Бүгүнкү күндө райондун элинин 90 пайызы ичимдиктин сатылуусуна каршы экенин билдиришип, кол коюп беришти”, - деди активист.
Билдирүүгө караганда топтолгон колду райондун акимятына жана прокуротурага өткөрүп берүү иштери калды. Ал эми активисттер сунуштаган талаптарды кандай чечери райондун акиминен көз каранды.
Активисттер тарабынан иштелип чыккан алты талап:
1. Токтогул районунун борборунда спирт ичимдиктеринин
сатылуусун чектөө;
2. Өспүрүмдөргө спирт ичимдиги сатылбасын;
3. Айылдарда спирт ичимдиктери сатылбасын;
4. Жергиликтүү бийлик токтом чыгарып беришин талап кылуу;
5. Ушул ишти көзөмөлгө алуучу органдарды дайындоо жана ар бир айылдын активистерин көзөмөлдөөчүлөргө кошуу;
6. Карантинден кийин массалык чогулуш уюштуруу.
Пикирлер (7)