Улуттук инвестиция агенттигинин директору Умбриэль Темиралиев кубаттуулугу 50 мегаватт болгон «Күн булагы» күн электр станциясынын курулушу менен таанышты. Бул тууралуу аталган мекеменин басма сөз кызматы билдирди.
Маалым болгондой, долбоор Ысык-Көл районунун Тору-Айгыр айыл аймагынын аймагында ишке ашырылып жатат. Жалпы инвестициянын көлөмү 35 миллион доллардан ашат. Долбоорду «Күн Булагы» ЖЧКсы казакстандык TGS-Energy Limited компаниясы менен биргеликте ишке ашырууда.
«Долбоор Кыргызстанда кайра жаралуучу энергия тармагында биринчилерден болуп саналат. Аны ишке ашыруу өлкөдө электр энергиясын өндүрүүнү көбөйтүүгө жана ички керектөөнү жарым-жартылай жабууга жардам берет. Буга чейин аталган компания Тору-Айгыр айыл аймагынан жалпы аянты 80 гектар жер тилкесин алуу боюнча тендерди утуп алган. Бүгүнкү күндө инвестор долбоордун техникалык-экономикалык негиздемесин иштеп чыгып, «Кыргызстандын улуттук электр тармагы» ААКсынан алдын ала техникалык шарттарды алды. Ишкана инженердик-геологиялык жана инженердик-геодезиялык изилдөөлөрдү жүргүзгөн. Жакынкы аралыкта айыл чарбадагы жоготууларды жана алынбай калган пайданы төлөп, ошондой эле айыл өкмөтү менен келишим түзгөндөн кийин компания жабдууларды алып келип, объектинин курулушун баштайт», - деп билдирди Улуттук инвестиция агенттиги.
Пикирлер (0)
Пикир жок. Сиз биринчилерден болушуңуз мүмкүн