Транспорт министри Гамбург шаарында эл аралык форумга катышты

Кечээ транспорт жана коммуникациялар министри Абсаттар Сыргабаев Германиянын Гамбург шаарында өткөн "Жаңы маршруттар, жаңы рыноктор: Глобалдык жана Ортоңку коридордо жайгашкан мүмкүнчүлүктөр" аттуу эл аралык форумга катышты.

Ведомстводон маалымдашкандай, форумда сөз сүйлөгөн министр Сыргабаев Кытай – Кыргызстан – Өзбекстан темир жолун куруу Чыгыш менен Батыш өлкөлөрүн байланыштыра турган маанилүү, стратегиялык көпүрө экенин белгиледи.

"2024-жылы өлкөбүздүн тарыхындагы эң ири долбоорлордун бири – Кытай – Кыргызстан – Өзбекстан темир жолунун курулушуна старт берилди. Долбоор соода-экономикалык байланыштарды чыңдоого мүмкүндүк берет. Кытайдан, Чыгыш Азия өлкөлөрүнөн Жакынкы Чыгышка жана Европага жүктөрдү жеткирүү мөөнөтү болжол менен 7-8 күнгө кыскарат", -деди министр.

Мындан тышкары, Сыргабаев транспорттук-логистикалык инфраструктураны модернизациялоо жана заманбап, санариптик технологияларды киргизүү боюнча жүргүзүлүп жаткан иштер эл аралык жүктөрдү ташуу процесстерин жөнөкөйлөтүп, транспорттук ташууларды тездетүүгө жана өлкөнүн транзиттик потенциалын өнүктүрүүгө өбөлгө түзө турганын кошумчалады.

Ошондой эле форумдун алкагында министрлик тарабынан жол-транспорт тармагындагы инвестициялык долбоорлор презентацияланды.

Белгилей кетсек, аталган форумда порт, темир жол транспорту жана мультимодалдык ташууларды өнүктүрүү боюнча маселелер талкууланып жатат.