Түндүк Кореядагы жарылууда ондогон адамдардын каза болгону айтылууда

Түштүк кореялык журналисттердин маалыматы боюнча, Түндүк Кореядагы Хайсан шаарында газ баллон жарылган. Бул тууралуу “Лига Новости” интернет парталы жазып чыкты.

Түндүк Кореядагы жарылуу боюнча тартылган видео Кытайдын аймагында Интернет булактарында пайда болду. Associated Press агенттиги бул видео жаздыруу чек арага жакын шаарда иштеген кытай туристтик агенттигинен алынганын жазып чыкты. Жарылууга эмне себеп болгону азырынча так аныктала элек.

Ошондой эле Кытай дагы, Түндүк Корея дагы жарылуу тууралуу расмий комментарий бере элек. Бирок Түштүк кореялык ЖМК өкүлдөрү жана тышкы мониторинг топтору маалымдагандай, газдын жарылуусунун натыйжасында Кытай менен Түндүк Кореянын чектеш аймагындагы Хайсан шаарында ондогон адамдар өлүп жана жарадар болушкан.

Бул маалыматты тактоого азырынча мүмкүндүк боло элек, деп кошумчаланат маалыматта.