Түркиядагы кыргыздар 15 даана кычкылтек концентраторун жөнөттү

Түркиядагы кыргызстандыктар жөнөткөн 15 даана кычкылтек концентратору КР Саламаттыкты сактоо министрлигине өткөрүлүп берилди.

Республикалык ыкчам штабдан маалымдашкандай, 3 күндүн ичинде бул жабдыктар Чүй жана Ысык-Көл облустарындагы, ошондой эле Бишкек шаарындагы медицина мекемелерине таратылып берилет.

Аманатты "Кыргызстан достук жана маданият" коомдук бирикмесинин өкүлү Туйгун Эргешов тапшырды. Жалпы наркы 10 миң долларлык гуманитардык жардамды Коомдук саламаттыкты сактоо башкармалыгынын жетекчиси Айнура Акматова кабыл алды.

Түркиядагы кыргызстандыктардын айтымында, бул колдоо акыркысы эмес. Алар учурда өлкөгө муктаж болгон дары-дармектерди алып келүү жаатында иш алып барууда.