УКМК: “Ала-Арча” соода борборундагы 344 млн сомдук аянт мамлекетке кайтарылды

Бишкектеги “Ала-Арча” соода борборунун 3-кабатында жалпы суммасы 344 млн сом болгон 2 миң чарчы метр аянты мамлекетке кайтарылды. Бул тууралуу Улуттук коопсуздук мамлекеттик комитети билдирет.

Ведомстводон белгилешкендей, тергөө иштеринин жүрүшүндө 2007-жылы Бишкек мэриясынын токтому менен “Э.И.Г.” компаниясына Тынчтык проспектисинде коомдук жана соода борбору бар көп кабаттуу турак жай комплексин долбоорлоо жана куруу үчүн 2,16 га жер тилкеси 49 жылдык мөөнөткө убактылуу пайдаланууга берилгени аныкталды.

Бишкек мэриясы тарабынан жогоруда аталган жер тилкелерин берүү шарттарына ылайык, ижара берүүчү курулган турак жайдын 10 пайызын муниципалдык менчикке өткөрүп берүүгө милдеттендирилген.

Ошол эле учурда, 2017-жылы “Э.И.Г.” компаниясы пайда алуу максатында жана бул милдеттенмелерди аткарбоо максатында (б.а. көп кабаттуу үй куруу) 1074 га жер тилкесин “Т.И.” ЖЧКсына сатып жиберген, ал өз кезегинде “Ала-Арча” соода борборун куруп салган.

Козголгон кылмыш ишинин алкагында көрүлгөн комплекстүү иш-чаралардын натыйжасында “Т.И.” ЖЧКсы “Ала-Арча” соода борборундагы (3-кабат) аянты 2000 чарчы метр, наркы 344 млн сомдук турак эмес жайды Бишкекмэриясынын ММБДнын балансына өткөрүп берди.

Белгилей кетсек, аталган 2 миң чарчы метр аянтта балдар аттракциону бар, анын ижара акысы эми шаардык бюджетке түшөт.

Учурда башка тиешеси бар адамдарды аныктоо боюнча ыкчам-иликтөө иш-чаралары жүргүзүлүп, ушул сыяктуу фактыларды аныктоо жана бөгөт коюу иштери улантылууда.