Улуттук банк: Жыл башынан бери 8 жолу, баш-аягы 200 млн доллардан ашуун интервенция жасалды

Үстүбүздөгү жылдын башынан тартып 10-апреге чейин Кыргызстанда АКШ долларынын расмий курсу 11,92 пайызга жогорулады. Бул тууралуу улуттук банктын расмий өкүлү Аида Карабаева бүгүн, 10-апрелде онлайн брифингде билдирди.

Анын айтымында, 2020-жылдын башынан бери бүгүнкү күнгө чейин улуттук валюта курсунун кескин түрдө серпилүүсүнө жол бербөө үчүн Улуттук банк 8 жолу интервенция жасады. Анын жалпы суммасы 216,9 млн АКШ долларын түздү.

Улуттук банктын эл аралык камдарынын көлөмү жеткиликтүү, тактап айтканда кечээ, 9-апрелге карата 2 млрд 268 млн долларды түзөт. “Кыргызстанда ички валюта рыногунда азыр абал туруктуу”, - деди ал.

Карабаева мындан тышкары өзгөчө абал учурунда керектөөчүлөрдүн укугун коргоо боюнча электрондук почта же телефондор аркылуу келип түшкөн арыздар каралып жатканын билдирди.