Вашингтондо Трамп менен Зеленскийдин жолугушуусу жаңжал менен аяктады

28-февралда Вашингтондо АКШнын президенти Дональд Трамп менен Украинанын президенти Владимир Зеленский жолукту. 

ТАСС маалымдагандай, сүйлөшүү учурунда Трамп Зеленскийди Украинадагы кырдаалды жөнгө салууга умтулбай жаткандыгын айтып сындаган. Ошондой эле ал Зеленский эпке келбесе, АКШ Украинага колдоо көрсөтпөй тургандыгын белгилеген.

Жолугушууда Трамп АКШ Украинага 350 млрд доллар өлчөмүндө чыгаша сарптаганын кошумчалаган.

Сүйлөшүү ортолоп калганда залдан журналисттердин чыгышы керектиги айтылып, андан ары Трамп менен Зеленский жабык эшик артында маегин улантышкан.

Ак үйдөгү жолугушууда эки өлкө ортосунда пайдалуу кен байлыктар боюнча келишимге кол коюлушу керек болчу. Бирок Зеленскийдин Ак үйдөн эрте чыгып кеткендигине байланыштуу документке кол коюлган эмес жана пландалган президенттердин биргелешкен маалымат жыйыны да болбой калган.

Белгилей кетсек, 26-февралда Дональд Трамп Вашингтон Москва менен Киевдин макулдашуусуна жетүүсүн каалай тургандыгын жана Украинадагы кырдаалды жөнгө салууга аракет кыларын билдирген.

Буга чейин 12-февралда Трамп Путин менен телефон аркылуу сүйлөшкөндө да ушул пикирин айткандыгын Ак үй маалымдаган эле.