Жогорку Кеңештин транспорт, коммуникациялар, архитектура жана курулуш боюнча комитетинин жыйынында депутаттар Транспорт министрлигинин ишмердүүлүгүн иликтөө боюнча комиссия түзүүнү карады.
Эл өкүлдөрү ведомтсвонун ишмердүүлүгүн иликтеп чыгууну мерчемдөөдө. Комиссияга ким мүчө болуп, канча адам кирери комитеттин кийинки жыйынында карала турган болду.
Жол фонду боюнча мыйзам каралып жаткан учурда депутат Улугбек Ормонов жумушчу топ түзүп, Транспорт министрлигиндеги кошумча түзүмдөрдүн ишин текшерип чыгууну сунуштады.
"Мамлекеттен бөлүнгөн каражаттын дайыны жок! 2023-жылы Транспорт министрлиги менен келишим түзүп, жумушту аткарып, акчасын ала албай жүргөн ишкерлер бар. Булар мынча чакырым жолду бүтүрдүк деп доклад берип жатышат, аны бүтүргөн кишилер ар бир кабинеттин эшигин каккылап, "акчамы кимден алам" деп жүрөт", — деди Улугбек Ормонов.
Буга утурлай эле депутат Бактыбек Сыдыков аталган фонд азыр жөн эле акча бөлүштүрүүчү орган болуп, райондордо жол салынбай калганын айтты.
Пикирлер (0)
Пикир жок. Сиз биринчилерден болушуңуз мүмкүн