ЖК дин чөйрөсүндөгү мыйзам долбоорлорду экинчи жана үчүнчү окууда жактырды

Жогорку Кеңеште дин чөйрөсүндөгү мыйзам долбоорлору экинчи жана үчүнчү окууда жактырылды.

Аталган документтер диний чөйрөнү иретке келтирүү максатын көздөйт. Ага ылайык, төмөндөгүлөргө тыюу салынат:

- коомдук жайларда жана мамлекеттик органдарда адамдын өздүгүн тааныганга мүмкүндүк бербеген кийимдерди кийүүгө;

- диний уюмдардын, окуу жайлардын жана миссионерлердин ишмердүүлүгүнө, ошондой эле адамдардын диний жана башка ишенимдерин эркин тандоосуна, билдирүүсүнө же өзгөртүүсүнө мыйзамсыз тоскоолдук кылууга жана мажбурлоого;

- карылар, майыптар үйлөрүндө, түзөтүү мекемелеринде, тергөө изоляторлорунда, ошондой эле Куралдуу күчтөрдүн кошуундарында, бөлүктөрүндө уруксаты жок диний иш-чараларды өткөрүү үчүн диний ишмерлерди чакырууга;

- мечиттерде саясий мүнөздөгү (мисалы, үгүт) чогулуштарды өткөрүүгө;

- диний уюмдардын бийлик органдарынын жана кызмат адамдарынын ишине кийлигишүүсүнө;

- өз алдынча диний сабактарды окутууга;

- диний адабияттарды, аудио жана видеоматериалдарды коомдук жайларда, мамлекеттик жана муниципалдык уюмдарда, бала бакчаларда, мектептерде, ошондой эле турак жайларды кыдырып таратууга;

- диний субъектилер тарабынан саясий партиялардын ишин каржылоого;

- ыйгарым укуктуу органдардан каттоодон өтпөстөн диний ишти жүзөгө ашырууга, диний багыттагы объектини пайдаланууга;

- динине карата оозеки же жазуу жүзүндө, анын ичинде интернетте басмырлоого;

- диний негизде саясий партияларды түзүүгө, ошондой эле саясий партиялардын диний ишке катышуусуна;

- шайлоо алдындагы үгүт учурунда, партиянын аталышында диний маалыматтардын (сүрөттөрдүн) бөлүктөрүн жана элементтерин чагылдырууга жана пайдаланууга;

- депутаттык ыйгарым укуктарды, жетекчилик кызматты диний иш менен айкалыштырууга;

- диний ишмерлер шайланууга укуксуз.

Эреже бузган жеке жактарга 20 миң сом, юридикалык жактарга 60-65 миң сом айып салуу каралган.