Жакында Токтогул жана Үч-Коргон ГЭСтеринин бирден гидроагрегаттары реконструкцияга берилет.
Реконструкциялоо иштери Энергетика министрлигинин 2025-жылга коюлган планына ылайык, энергетика тармагындагы эскирген жабдууларды жаңылоо, кубаттуулукту көтөрүү максатында келишимдин негизинде жүргүзүлөт.
Токтогул ГЭСин реконструкциялоонун алкагында төртүнчү агрегатты алмаштыруу иштери 20-февралда башталат. Келишимдин негизинде реконструкция жана жаңылоо долбоорун Францинын GE Hydro компаниясы ишке ашырат.
Реконструкция иштери аяктагандан кийин Токтогул ГЭСинин кубаттуулугу дагы 60 МВтка көбөйөт. ТГЭСтин бардык 4 гидроагрегатын алмаштыруу менен реконструкция долбоору толугу менен аяктап, 2025-жылы станциянын кубаттуулугу 1440 МВт түзөт. Кошумча 240 МВТ кубаттуулук кошулат.
Ал эми 2025-жылдын 1-марттан тарта Үч-Коргон ГЭСинин экинчи гидроагрегаты реконструкцияга берилет. Келишимге ылайык, реконструкция жана жаңылоо долбоорун кытайдын CNEEC (China National Electric Engineering) компаниясы ишке ашырат. ГЭСтин гидроагрегатынын кубаттуулугу оңдоп-түзөө иштеринен кийин 9 МВтка көбөйөт.
Эске салсак, Үч-Коргон ГЭСинде кубаттуулугу 45 МВт болгон 4 гидроагрегат жайгашкан. 2024-жылы №4-гидроагрегат реконструкциядан өтүп, кубаттуулугун 16 МВтка жогорулады. Азыркы учурда ГЭСтин жалпы кубаттуулугу 189 МВтты түзөт. Эскилиги жеткен гидроагрегаттар 1962-жылы ГЭС курулгандан бери бир да жолу реконструкциялоодон өткөн эмес.
ГЭСтердин гидроагрегаттары реконструкцияга берилсе, Токтогул ГЭСинен 300 МВт, ал эми Үч-Коргон ГЭСинен 45 МВт болгон кубаттуулук кыскарат. Реконсрукциялоо иштерин 2025-жылдын декабрь айларына аяктоо пландалууда.
Пикирлер (0)
Пикир жок. Сиз биринчилерден болушуңуз мүмкүн