Жалал-Абадда ооруган милиционерлер үчүн дем алдыруучу аппараттар тапшырылды (фото)

Бүгүн, 20-июль күнү Жалал-Абад областынын Базар-Коргон районунун тургуну “Бай-Дыйкан” айыл чарбаны колдоо борборунун жетекчиси Акунбеков Эрлист тарабынан Жалал-Абад ОИИБдин медицина кызматына 2 даана жасалма дем алдыруучу медициналык аппараты тапшырылды. Бул тууралуу облустук ички иштер башкармалыгынын басма сөз кызматынан маалымдашты.

«Эң негизги максат - эл менен тыгыз байланышта иштеп, жарандардын коопсуздугун камсыздап жаткан милиция кызматкерлеринин ден соолугуна да кам көрүү. Андыктан, бизден жардам болсун деп ушул аппараттарды берип жатабыз, оорубаңыздар урматтуу орган кызматерлери», - деди өз сөзүндө Э.Акунбеков.

Ал эми Жалала-Абад ОИИБдин башчысы, милициянын полковниги Кылыч Жолдошов алгач демөөрчүлөргө ыраазычылыгын билдирип, «бүгүнкү аппараттардан сырткары ИИМден да 2 аппарат келди, бул медициналык каражаттар биздин кызматка берилет. Учурда милиция кызматкерлеринин арасынан ооруга чалдыккандарга тез жана сапаттуу, өз убагында тиешелүү деңгээлде кам көрүп, жардам берүү максатында мобилдик топтор түзүлдү», - деди.

Бул топтор кызматкерлердин үйүнө чейин барып, медициналык жардам көрсөтүп, аппараттарды үй шартында да коюп берүүгө даяр экендиги белгиленди.