Жанар Акаев, ЖК депутаты: “Аткаруу бийлигинде иштөө ниетим бар”

- Жанар мырза, бүгүн маданият министринин талапкерлигин талкуулоо учурунда “ал сөзсүз эле маданият өкүлү (жазуучу, сүрөтчү же музыкант) болушу шарт эмес. Менеджер болушу керек” деген пикирлер айтылды. Сиз бул пикирге кошуласызбы?

- Министрликтердин жетекчилери биринчи кезекте менеджер болушу керек. Министр – бул башкаруучу. Ал ишти туура бөлүштүрүп, ар бир тармак боюнча өзүнүн орун басарлары менен иштеп, тармакты алдыга жылдырганы маанилүү. Мына, Америкадагы кээ бир дайындоолорду көрүп атабыз. Диплому жок эле кишилер килейген державаны аңтар-теңтер кылып атышат. Ошол эле Илон Маск, же Марк Цукерберг. Ошон үчүн көп өлкөлөрдө жетекчи кызматтарга кризис-менеджерлерди алып келет экен. Азыр эми маданият министрлигине төкмө акынды же жазуучуну коюп алсак, ал ошол тармак менен алек болот негизинен. Бирок, депутаттардын суроолоруна берген жоопторунан улам азыркы талапкерден мен өзгөчө чоң менежджерликти деле көргөндөй болбодум. Же башында сүрдөп атабы, бир аз чабалыраактай көрүндү. Себеби, бул тармакта маалымат саясаты бар, өлкөнүн 33 пайызын түзгөн калың катмар – жаштар турат. Ошондон улам “чоң тармакты тартып кете алабы?” деген күмөн ой жаралды менде. Бул жигит министр болгондон кийин эртең Шайлообек Дүйшеевдин же Сабира Күмүшалиеванын юбилейине барабы, маданияттын “менмин” деген дөө-шааларынын алдына барганда, камчы салдырбай сүйлөп, тилине эл канааттанып, “ох ата!” деп туруш керек да. Кагаздан эптеп окуп берип атса, быякта отургандар дагы “кап, ата...” деген ойдо калат. Мен министрликке менеджерлер келишин колдойм, бирок, камчы салдырбаган тыңдары келсе жакшы болмок. 

- Сиздин өзүңүзгө “маданият министри болуп бер” деген сунуш түшүп калса эмне кыласыз?

- Азыр парламентте сегиз депутат менен бир фракцияны башкарып отурам. Биз билим берүү, тарых боюнча мыйзам долбоорлорун кабыл алдык. Дагы бир-эки миссиябыз калды. Аларды бүтүргөндөн кийин, албетте, Кудай буюруп, эл колдоп парламентке кайра келип калсак, аткаруу бийлигине (кайсы тармак экенин так айта албайм) барып иштөө ниетим бар. Аны жашырбайм.  

Булак:  "Азия Ньюс" гезити