Жанар Акаев дарыгерлерге кол салгандарды жазалоону сунуштады

Акыркы убакта ооруканаларда дарыгерлерге кол салуу фактылары катталууда. Бул өкмөттүн көңүлүн жана чечимдерин талап кылат, деп билдирди депутат Жанар Акаев 8-февралда парламенттин жыйынында.

Ал Кыргызстан ымыркайлардын өлүмү, энелердин өлүмү, онкология, жүрөк-кан тамыр оорулары боюнча алдыда экенин эске салды. «Мындай шартта дарыгерлерге көңүл буруп, алардын маянасын көтөрүүнүн ордуна, дарыгерлерге кол салуу фактыларын унчукпай карап жатабыз», - деди ал.

Депутат Кыргызстанда көптөгөн дарыгерлер жумушун таштап, Орусияга кетип жатканын айтты.

«Жаш дарыгерлер 13-15 миң сомдон алышат. Бул каражатка үй-бүлө багуу мүмкүнбү? Мен жакында дарыгер менен сүйлөштүм. Ал троллейбус айдоочуларынын айлыгы 50 миң сомго чейин көтөрүлүп, 14 миң сом алып жатканын айтты. Бул кандай?" - ал сурады.

Акаев Казакстанда дарыгерлерге кол салгандар 7 жылга чейин эркинен ажыратыларын айтты. «Биз да ушундай кылууга аргасыз болобуз. Баардык өнүккөн өлкөлөрдө дарыгерлер абдан кадырлуу адамдар. А бизде кирип, телефонуна тартып, кол салып чыгып кетишет. Эмне үчүн укук коргоо органдары жетиштүү көңүл бурушпайт жана чечим кабыл алышпайт?». - деп сурады.

Депутат дарыгерлерге артыкчылык берилип, алардын айлыгын көтөрүү керектигин айтты.