Сыймык Жапыкеевге генерал-майор наамын ыйгаруу менен бул званиянын баркын түшүрүп жатышат. Мындай пикирди генерал-майор Шейшенбек Байзаков “Медиа центр” мультимедиалык-маалымат агенттигине берген комментарийинде билдирди.
Ал белгилегендей, бул өтө бийик наам, ага татыктуу болуш үчүн ошондой эмгек кылып, чоң жолдон өтүш керек. “Мен мисалы, лейтенанттан баштап бардык баскычтарды басып, советтик мерка менен 17 жылда полковникке жеттим. Кайра толук 17 жыл полковник наамы менен жүрдүм. Бул жылдар аралыгында бир топ окуучуларым полковник болушту. Узак жол басып, көп кызматтарда иштедим. Андан кийин гана генерал-майор наамын алгам. Ал эми Жапекеев кечээ келип, бүгүн генерал-майор болуп алды. Бул наамга көрсөтүү менен ага татыктуулугун карап, макулдук берген тиешелүү органдар мамлекет башчысын уят кылууда", - дейт ал.
Байзаковдун ою боюнча, Жапыкеевге генералдык наамды шашылыш беришти. “Кайсы эмгеги үчүн ыйгарылды?”Финполдо жетекчи болуп 3-4 ай гана иштеген адамга берүү менен жогорку наамды “өтө девальвация” кылып, баркын түшүрүп коюшту. Мен мындай пикирди айтуу менен көптөгөн генералдардын оюн билдире алдым деп ойлойм”, - дейт Шейшенбек Байзаков.
Пикирлер (5)